AWM HRANNA ( Short Sermon).

"Ringlo mite nen rual lo taka nghawngkawl bat dunin awm suh u;suahsualna leh felnain engnge intawmna an neih?.Anih loh leh thim leh engin engnge inpawlna an neih?....Chuvangin, "An zing ata lo chhuak ula, Ahrangin awm rawh u,...(2.Kor.6:14-18.)

'Awm Hranna' awmzia chu, khawvel thil leh nun atanga, a hnen lama awm tur a Pathianin a Fapa Isua

Chhandamna hmanga a 'kohchhuah' 'Awm hran tir' te nun sawina a ni. Pathian hian khawvel mite leh an thiltihte

laka min awmhrantir hian chhan leh vang a nei thin a,

hmanrua pawh a hmang bawk thin a ni.

THUTHLUNG HLUI MITE

Abrahama kha Pathianin Haran khua atanga a koh chhuah khan ti hian a sawi a " I khaw lam ata leh I laichhin te ho zinga ta leh I pa in ata chhuak la, ram ka la entir tur che lamah kal rawh'. (Genesis 12:1) Pathianin a koh chhuah chhan chu, ram ka la entir tur che lamah' tih vang a ni a. Lota leh a chhungte kha Sodom khaw kang tur laka tangin an kut ah a chelh a, a hruai chhuak a (Genesis 19:16) Israel fate kha Pathianin " Nangni chauh hi khawvela chhungkua zawng zawng a ka hriat in ni a. (Amosa 3:2) a tih avangin, Josefa leh a chhungte chu Gosen ramah Aigupta mite nena in awmpawlh lo turin ram a pe bawk a (Genesis 47:6). Malsawmna an dawn theih nan " Chhuak rawh u, chhuak rawh u..." (Isaia 52:11) tiin Jerusalem sual na laka inthiar fihlim a, a lawm zawng a nung tur in a ko bawk a. Tichuan Pathian in Insrael fate chu ei leh in tuir chen in a ti hrang hial a. (Lev.11:1-47)Thlarau lam nun atan pawh Dan zawm tur a pe a ni. (Exodus 20:1-17).

THUTHLUNG THAR MITE

I Peter 2:9 ah chuan ti hian kan hmu a "nimahsela thim ata chhuak a eng mak tak a lut tura ko tu che u thatna chu in entir theih nan nangni zawng chi thlan Lal Puithiam ho, hnamthianghlim, Pathian mite ngei in ni si a". Hei hian thuthlung thar fate chu Pathian ta leh a khua leh tui ni tur in fapa Isua Krista hmangin min ko ti kan hmu a ni. "In thi tawh a in nunna chu Pathianah chuan Krista hnenah thuhrukin a awm si a" (Kol 3:3) Thuthlungthar fate chu "Kros chuan khawvel nen min ti hrangta" tiin 'Awm hranna' chu a lo thleng ta a ni.

ENGTIA AWMHRAN TUR NGE ?


a) Van mi anna nun vangin : " leia siam mi anna kha kan put angin, van mi anna chu kan pu bawk dawn a ni (Kor 15:49). Lal Isua Chhandamna avang chuan 'Mithianghlim ten nen chuan tualkhat leh Pathian chhungte kan ni ta zawk a. (Ephesi 2:19). Anih na diktak chu 'he lei rammi kan ni lo khualzin kallai mek kan ni' tih hla ang hi a ni'. Chuvangin, Lal Isuan tawngtai dan tur min zirtir pawh in" I duh zawng Vanah an tih angin lei a min ti rawhse (Matthaia 6:10) ti turin ' Awm hranna nun' chu a rawn sawi hial a ni, kan awmdan leh rilru put hmang te chuan van lam thil ngaihtuah ila, ' I ro awmna apiangah I rilru a awm thin' tih a ni si a.

Khawvel thilin min chiahpiah thin mahsela, chung lama rilru nghah tlatna nun 'Awmhranna' avang chuan Vana mi anna nun chu vawnhim a tul thin (Chutichuan Krista hnenah kaihthawhin in awm ve tawh chuan chung lam, Pathian ding lama thu Krista awmnaa thil awmte
chu zawng rawh u (Kolossa 3:1). Van mi anna nun hrang kan neih lai hian thlarau do thintu tisa chaknate chu bansan a lo tul a, chu 'bansanna' nun chu 'Awmhranna nun' ze dik tak chu a lo ni (Duh tak te u, mikhual leh khualzin in nih avangin, thlarau do thintu tisa chaknate bansan turin ka ngen a che u, ( 1. Peter 2:11).

Nun leh thiltih ah : Piangthar Mize hlui a nung reng leh danglamna nei lo chu awmhranna ah a awm lo a ni ( ...mihring hlui chu a thiltihte chawpin in hlip tawh a, mihring thar chuan in inthuam tawh si a, chu mihring thar chu hriat famkimna nei turin, a siamtu anpui ang a siam thar in a awm a mek a ni. -Kolossa 3:9,10). Pathian hian a mite hi a mittlungin kan awm tih hriat hranna leh kan inthlair hranna tur min pek chu kan hnena a awm thin hi a ni a (Exodus 33:16), Chutiang bawk chuan aman min serhhran, awmhrantir tawh avangin kan chetzia, nun leh thiltih pawh a hrang a lang chhuak tur a lo ni thin (II Kor. 6:17, Ephesi 5:11).

A Tlangpuiin hengte hi tih loh tur a ni.

1. Inngaih leh bawlhhlawh zawng zawng.
2. Duhamna pawh lam loh tur.
3. Zahmawhte, thui lawilo sawi te, fiamthu te pawh.
4. Ringlo mite nen rual lo taka nghawngkawl bah dun loh tur.

C) Nun Krista : Galatia 2:20 ah chuan 'Awmhranna' nun chu ti hian a sawi "....Nimahsela ka nung a ni; keimah erawhchu ka ni tawh lo; Krista chu keimahah a nung zawk a ni.." Tunhma a khawvel tana nung kha 'Krista tan' a lo nungin a lo awmhrang ta a. Khawvel a awm lai chuan khawvel atangin khawvel tan a nung a, Krista ah erawh chuan Krista avanga nungin Krista tan a nung a ni. Ringtu tam tak an nunna inngahna khawvel thil la ni tlatte leh an nunna pawh khawvel nen la inkaihhnawih tlat a awm fo thin. Chuvangin, khawvel tan khenbeh a awm a, amah pawh khawvel tan khenbeha awm (Kros nun-Galatia 6:14) nun neih a tul a ni. Kan thiltih leh duhzawng te chu, khawvel mi pawhin chutiang ti thin nia min ngaih theih loh tura nun a pawimawh thin.

Khenbeh nun chuan 'awmhranna' min pe a kan taksa duhzawng leh thiltih pawh a lo danglam ngei ngei thin.( In taksa pengte pawh fel lohna hriamhrei atan sualna hnenah pe phal hek suh u, amaherawhchu mitthi zing ata nung leh angin Pathian hnenah inpe ula, intaksa pengte pawh chu felna hriamhrei atan Pathian hnenah pe phal zawk rawh u. (Rom 6:13).

D) Awmhran Hlenna : Khawvel a an awm laia khawvel thil/tisa thil laka awmhranna chuan thih hnuah, Pathian rorelna hmaah 'Awmhranna' ah a hruai dawn a. He khawvelah sual leh a thiltihtheihna atanga awm hrang lo tute chu 'Awmhranna' tawng mahse, chatuan 'Hremhmun a awm hranna' a ni thung dawn a ni. " Khawvel tawp hunah chuan chutiang bawkin a awm ang; Vantirhkohte chu an lo chhuak ang a, mi fel zing atan misualate chu an hlir ang a". (Matthaia 13:49) Beram leh kel angin a thliar hrang bawk ang. (Matthaia 25:32,33). Hemi hunah hian ringtu Pathianin a kohchhuah " An zing ata lo chhuak ula, a hrangin awm rawh u" a tih zawm tute chu Pathian hnenah chatuanin an "Awmhrang" hlen tawh dawn a ni.

Rom 8:12 ah chuan," Chuvangin unaute u, bat kan nei; tisa dana awm turin tisa lakah erawh chuan ani lo," tih min hrilh a. Khawvelah hian ei leh in turte, kan mamawh ngaihtuahin hna pawh kan thawk in kan nitin mamawh tur kan ngaihtuah ang a, tisa dan in kan la awm ang . Amaherawhchu, Pathian duh loh zawng tisa thiltih erawh chu kan ti tur a ni lo.Ringlo mite nen ruallo taka nghawngkawl bat dun lova, Pathian ta an nih ang a an nun Pathian tana serhhrang tute nunah chuan," Anmahniah ka awm ang a, Anmahniah ka leng bawk ang,Tin an Pathian ka ni ang a, Anni pawh ka mite an ni ang,"(2.Kor.616) tiin a sawi a. Chutiang ti a nung te chu Pathianin ," Ka lawm ang che u a,In tan Pa ka ni ang a, Nangni pawh ka tan fanu fapa in ni ang, ( 2.Kor.6:17,18) a ti bawk a ni.Chuvangin, piangthar nun nei tur chuan, ' khawvel ata awmhran' a ngai a, Pathian lawmzawng, a fanu fapa ni tur chuan,'khawvel ata awmhran' a ngai a n i. AMEN.