SATANISM (SATANA BIAK)

"Nimahsela nakin hunah chuan mi thenkhatte chu, mi dawtheite vervekna avangin hruaibona thlaraute leh ramhuaite zirtirna thu ngaihsakin rinna chu an la bansan ang tih Thlarau chuan chiang takin a sawi a. (1.Tim.4:1,2).

SATANISM HI ENGE NI ?

Satanism han tih hian Satana pathian anga biate (worship) leh a kaihhnawih heng aien te, dawithiamte, thlarau biak te a huam thei ang a. Thuthlung Hlui hunah pawh khan Babulon mite zingah aien thiamte, aisan thiam te, mitdawivaih thiamte an awm thin a. Kannaan-ho pathian biak thin, Baal leh Asterothi te leh Amon ho pathian, khemos an biak thin dante ngaihtuah hian tunlaia "Satanism" kan tih ang tak hian hmelhriat ni lo mahsela a kalphung leh an sakhaw biak dan en chuan tunlaia satanism kan tih nen hian a kalphung in anna lai tam tak a awm ngei ang.

Baal puithiamte leh zawlnei Eliza an in el tum pawh khan Baal puithiamte kha an in zai thi nasa hle a ( 1.Lalte 18:28). Tunlai a Satanic in inthawina an hlan dan lar tak 'blood sacrifice' nen a in ang hle mai. Amon ho pathian 'Khemos' hnen a 'mei a kal tlang' an tih thin pawh kha satanic hovin mihring an hlan thin dan nen a in hnaivai hle a ni. Thuthlung Thar Kohhran hmasa ah pawh khan 'Satana inkhawmna in ho' (Thup.2:9, 3:9) tihte kan hmu bawk. Heng atang hian satanism hian a thlarauvin hun rei tak atang khan khawvelah hnuhma a lo nei tawh niin a ngaih theih rum rum a ni.

SATANA BIAKNA LO IN TAN DAN.

Satana Kohhran ( Church of Satan) dintu, Dr.Anton Szander Lavey hi kum 1930, April 11-ah Chicago-ah a piang a. A naupan lai atangin a pi hian thawnthu mak tak tak te a hrilh thin a.Chung thwhthute chu ngaihnawm a ti em em thin a. Lasi thawnthu ( fairy tales) leh superstition lam te chuan a nunah zung a kaih nasa ta hle a ni. Hun a lo kal zel a. A film en duhzawng leh ngainat zawngte pawh science fiction lam te, Dracula leh Frankenstein lam te a ni chho ta zel a ni. Amah hi thil la serious mi leh thil thiam thei tak a ni a, music a ngaina in keyboard tum phei chu a thiam em em a. Music bu en lovin music mawi tak tak a phuah chhuak (tum) thiam a. Chung vangte pawh chu a niang circus ah te leh intihhlimna hmun hrang hrang ah te pawh rimawi tumtu ah a tang thin a ni.

Superstition lama inhmang mi a nih vang hian mihring nunphung leh hlimna te pawh hi chutiang lam hawi a hman duhna lian tak a nei chho zel a. Kum 1966, April 30 khan 'Satana Kohhran' a lo din ta a. Satanic Bible pawh kum 1971 khan a lo siam chhuak ta bawk a ni.A ziritirna laimu ah chuan" Nuam i tih angin awm rawh" tih a nih avangin zuitu pawh an pung chak em em a. Chung zingah chuan Musician, zaithiam leh an hun laia mi lar tam tak an awm a ni. October 20,1997 ah a boral a. a boral hnu hian a nupui Magistra Blanche Barton-in Satanic Church hi a enkawl chhunzawm ta zel a ni.

SETANA BIAKNA LO DARHZAU ZEL DAN

Dr.Anton Lavey te khan an sakhaw hmuh chhuah thar kha khawvelah a darhzau na turin hma an la nasa em em a. Chanchinbu hrang hrang leh film industry kal tlangin an thehdarh nasa ta em em a ni. Chung zinga a lar zualte chu Brainiac, The Car (1997), The Devil's Rain (1975) leh The Witch's Mirror te an ni. Magazine hrang hrang pawhin an thu ziakte an chhuahsak thin a. Heng chanchinbu lar tak tak, Look, Mc Calls, Newsweek, Time te hian an pui nasa hle. Zaithiam an hun laia lar tak tak Marilyn Mansfield, Sammy Davis Jr. Marilyn Manson, Jayne Mansfield te pawh a phusa ber ber an ni ( by. Mafaka).
Heng bakah hian Heavy Metal hmangin Satana fakna hla thawndarh ani cham chi a. Rock Band zingah pawh a hlauhawm ber ber an awm a. AC-DC te, Led Zeppelin te, The Rolling Stones te, Motley Crue te, Kiss te, Twisted Sisters te, Judas priest te, Black Sabbat te, Ozzy Osbourne te, W.A.S.P te an ni a, heng ho zai hian Satana thuchah a keng tel a ni . Heng bakah hian Kristian Rock album ah te pawh Satana fakna a inzep a. Stryper ho hla 'In God we Trust' tih ah chuan " Chibai Lucifer" tih leh " Satana hmangaihna hmaah kan kun" tih a ni a, Daniel Band te siam "Rise up" ah pawh " Tunah Satana chibai i buk ang u" tih leh " Satana ka hmangaih ang " tih te a awm bawk( Source : Boruak Lal Vol.1. by P.C.Biaksiama ).

SATANIC CHURCH LEH SATANISM A DANGLAM EM?

Satana Kohhran ( Church of Satan) Dr.Anton Lavey-a hmuhchhuah chuan Kristian Kohhranten thil tha ni a kan inzirtir thin ang zawng zawng chu a kalh zawngin an inzirtir ve thin a. Khawvel ram thenkhat a bik takin America ramah phei chuan an tam hle a ni.He Kohhran hian Pastor te, Puithiam te, Upate neiin a huhova inkhawmna te an nei ve a. An pathian biak nan a an thuamhnaw hmante chu- puithiam kawrfual dum, maicham, sathau khawnvar, dar hmeh rik, tangkaraw no, zu chemte, mipa zahmawh lem, darkhuang leh savun lehkhate an ni. Mimal in leh lo ramah an inkhawm ber.Satanism chu ' dan bawhchhiatna leh thisen chhuahna hmanga ramhuai hnena inthawi thin an ni' a, a hmuchhuaktu pawh Aleister Crowley a ni a, 1905 khan Los Angelos ah a din a. A sakhaw hmuhchhuah thurin atan chuan anchhe lawhna, tualthahna, inpawngsualna, indona te leh thil tha lo lampang reng reng hi a pawm vek a ni mai.(source: Boruak Lal Vol-1 by P.C.Biaksiama).

SATANISM LEH MIZORAM

Satanism hi kan ramah hian thil thar a ni em?. Hnam mawl deuh lai thiltih a ni thei ang em? Satanism nen a ngaihpawlh theih thil, Paganism hi tribal zingah a hluar em/ tih te hi rilru a zawhna awm fo thin a ni.

Kan pi leh pute hunlai suangtuah let hian Puithiam, Bawlpu leh Sadawt kaltlang a' Ramhuai' hnena inthawina chi hrang hrang an lo hlan thinte leh tunlaia 'Satanism' kan tih hi sawi hran theih ni lawi si mahse a tawp a ramhuai biakna-a insuihfin leh si ang hi a ni awm e.Kan pi leh pute ka chuan an damlohna lak a tidam tur leh inthiarfihlim tur te, an hnen atanga kal bo tur te in 'Ramhuai' hnenah an inthawi thin a. Tunlaia 'Pathian anga bia'(worship) nen hi chuan a thu leh hla a dang deuh chuan a hriat, mahse an biak erawh chu thuhmun niin a lang a ni.

Kan sawi lan tawh ang khan tunlai khawvel a 'Satanic Church' leh 'Satanism' rawn tlangzarh tute khan Satanism hi khawvel hmelhriat turin kan kawtlai ah an lo pho chhuak a. Chung zinga an hmanrua chu Film Industry te, Music khawvel te, Cosmetic lam chi hrang hrang te, Fashion te, Graphic Art lam te leh Tattoo te chu sulsutu atan an rawn hmatheh ta ani.Chung thilte chu mi tam zawk tan kan nitin mamawh leh kan hmuh theihte leh ngainat zawng an lo nih bawk si avangin Satanism Spirit chuan kan ram ( Mizoram) hial a rawn dai ve ta a ni.Miin sex lam ngaihtuahna chang hre lo mahse Sex video, sex film, pornography te a en thin chuan a ngaihtuahna chu zawi zawi in chung thil chuan a lo hneh tial tial a, chutiang lam thil tih duhna chu a lo nei nge nge thin ang hian Satana hmanrua chi hrang hrang lo thleng hian Satanism lamah mi tam tak nun chu a lo kaihruai thin niin a lang.

Mi tam tak ka hmelhriat ten Satana an biakna lo intan dan an sawi chu Film, Music leh lehkhabu atang te in a nih thu an sawi. Chuvangin, Satana hian San Francisco-ah te chauh amah betute siam lovin awareness campaign a neihna hmanrua atangin a hlwhtlinna chu kan ram thalai thenkhat te chungah a lo thleng mek ta a ni.Mizoram hmun kilkhawr takah pawh Media hrang hrang hmangin khawvel changkanna chuan min hrut ve ta zel a, chumi rual chuan Satanism thlarau chuan thalaite nun tam tak a hip bet tlat a. Rock music hmangin an nun ah zawi zawi in bu a khuar a, film atangin nun rawnna leh thiltihtheihna (power) neih chakna a lo awm a.Tattoo chhut atangin milem mak pui pui ngainatna a lo chuak a, fashion hmangin thil tam tak thalai hip thei a lo awm a. Kawr thenkhat leh T-Shirt ah te chuan thu maksak leh milem mak pui pui, a then chu Satanic sign chi hrang hrang leh thuziak te a awm a. Thi locket te chu mihring luruhro lem te leh Satanic sign leh Symbol te a tam a. Tunlai mi nih duhna leh intih maksak duhna thinlung pu thalai tam tak thinlung chu he campaign hian 'indirect evangelism' hmangin a hrut ta mup mup mai a ni.

MIZORAM AH SATANA BETUTE AN AWM RENG EM ?.

Kum 1995 khan Pathian rawngbawltu pakhatin Mizoramah Satana betute an awm thu leh Ngaizel ( Kulikawn) ah an inthawi thin thu kan inah a sawi a. Chung hun lai chuan thil ni thei turah ka ngaih loh lutuk avangin 'fiamthu thawh' ang lekah ka ngai nghe nghe a. Mahse, kum 2004 atanga rawngbawlna avanga ka han tawn tak meuh chuan thil ni thei lova ka lo ngaih thin kha a tak ngei a ni tih phat rual lohin ka hre ta a ni.

Mizoramah hian thalai tam tak, thil sual ti lo leh Pathian tan a nung leh piangthar tha tak engemawzat an awm laiin thalai thenkhat Satana be duh hial khawp a nung khaw lo an awm tih hi belhchian dawl tak a ni a.Tun thleng hian Kohhrana rawngbawltu thenkhat zingah hetiang hi an awm ring lo leh heng mite tan a chhanchhuah hna thawk tute sawisel ching engemaw zat an la awm tho bawk a ni. Tin, Psychiatrist thenkhat leh Doctor tam tak pawh in an ring lo bawk.Thalai rual mi 16-20 vel, a huhova Satana be thin te, mi 5-10 vel te an awm bawk a. Hmanni lawk a Satana betu pakhat chuan thalai mi 200 rual an awm thu min hrilh tlat mai anih chu.Chung ho chuan pawl hming dangdai leh maksak tak tak, Satana fakna lam hawi zawng te an invuah a, Entirnan : Lucifer's Satan's Daughter ( LSD) tih te, Over Cute Girl ( OCD) tih te, Coyotte etc. Satana, a huho a be tur hian an inhmukhawm fo thin a ni.Chutiang pawl anga awm zat chiah erawhchu hriat a har hle a. Pawl thenkhat chu reilote ah an darh a, pawl dangah an awm leh bawk thin.

Satana bia-a pawl (group) anga awm te hian dan leh dun chu siam ve bawk thin mahsela veng hran leh hmun hrang hrang a mi te an nih ve fo avangin lungrual taka inhmukhawm a, kal zel chu an harsatna a ni fo a, mumal takin an kal thei thin lo. Group thenkhat chuan an pawl chhinchhiah nan an taksa-ah Tattoo te an chhu a, group thenkhat chuan an T-Shirt ah te an pawl hming an chhu bawk thin. Hetiang group member zinga mi hi an duh chuan an pawl atangin an talhrang ve mai a. An pawl chhuahsan tute lakah chuan invauna te chu nei ve thin bawk mahsela hlauhawm khawp a intihnat a awm loh vang pawh a ni mai thei an duh chuan an tal hrang a, anmahni remchan dan angin Satana biak chu an chhunzawm zel thin bawk a ni.

Mi thenkhat erawh chu pawl zawm pawh nei lem lo, mahni duhdan leh remchan dan anga Satana betute an awm bawk a. Chung mite chuan mi tihdan entawn kher lovin an thiam dan ang angin Satana chu an be mai thin a ni. Hetiang mite hi tleirawl kum 15-18 inkarah a hluar emaw tih tur a ni nghe nghe . Heng mite hi High School level ah leh Hosteller zingah an awm nual mai.Tin, De-addiction centre thenkhat leh Home thenkhatah an awm bawk.Thil pawi tak erawh chu, heng mite hi an fimkhur em em a, Teacher / warden ten an hre lo fo a, a hria an awm pawhin an tha en mai mai a. Nu leh Pa thenkhat an fanu/fapa in Satana a bia tih hre reng chung pawh a engah mah ngai duh chuang lo sawi tur an awm bawk.

ENG VANGIN NGE MIZORAM A THALAI THENKHAT TEN SATANA AN BIAK ?.

Kum 2004 tawp lam atang khan Mizoramah Satana biak duhna hi a lo thleng nasa zual a, Kohranah 'thlarau lama harhna'( revival) lo thleng thin ang mai hian 'Satana biak duhna harhna'( revival of Satanism) chu a lo thleng a, mi tam tak erawh chuan kan hre lem lo. Kum 2005 chhung khan a nasa zual nghe nghe a ni. Hemi chungchang hi Satanist pakhat nen a kan inkawm tumin ka sawi a, ani chuan ," I sawi dik chiah a nih chu. Khang hun lai khan kum 12 ka ni a, zanah te hian ka muhil thei ngai lo va , Satana be turin tunge min tanpui ang, engtin nge a biak dan tur tih hlir ka ngaihtuah a. Satana biak dan min zirtir thei awm tur a ka ngaihte ka zawng kual nasa em em a. Ka nun zawng zawng hi Satana biak chakna hian a luahkhat tlat a, mak tak a ni," tiin a sawi nghe nghe. Tun lai hian Satana be thar chu an awm pheuh pheuh mai thei. Kum 2004 hma lam a pawl(group) leh mimal anga Satana lo be thin mi tlemte bakah a tam zawk chu kum 2004 leh 2005 a revival anga lo thleng atanga Satana be tan te an ni tlangpui awm e.

Satana an biakna chhan bulpui hi a in ang lo hlawm em em a. A then chu ruihtheih thil pawh ti lem lo mahse, an thiante emaw an chhungte zinga mi tu emaw an huat ruk em em tihnat an duh avanga Satana thiltihtheihna beisei te an awm a. Mi thenkhat chu ruihtheihthil Satanan a ngaihtuahsak beisei vang te an ni a. Mi thenkhat chu a pawina pawh hre lem lo tih ve chak hrim hrim vang te an ni a. Mi thenkhat chu Pathian laka beidawng te an ni a. Thenkhat chu khawvel hausakna leh hlimna beisei vang te an ni a. Zirlai ( student) tam tak chu 'lehkha thiam theihna hmuh beisei vang' te a ni bawk a. Mi thenkhat chu awmngaihna hriat tawh loh vang te an ni a, mi thenkhat chu mi maksak nih duh vang hrim hrim te an ni bawk. Satana betute hi mi thenkhat chuan hmangaihtu an neih loh vang te leh chhungkaw kehchhia (broken family) atanga seilian an nih vang ah te an ngai fo thin. Mi thenkhat nun ah chuan dik mahsela a tam zawk hi chu chhungkaw pangngai tak a mi an ni mah mah zawk. Rawngbawltu chhungkua a mi te, mi awmthei tak chhungkua a mi te, piangthar anga lang, a ruk a Satana bia te an awm nuk mai.

ENG HUNAH NGE ? KHAWI HMUN AH NGE AN BIAK THIN?

Mizoramah hian a hu hova Satana betute hian hmun fianrial an thlang thin a. Khaw pawn emaw miin an hmuh mai lohna tur hmun thelh deuh lai emaw, mi tlawhpawh vak loh tur hmun emaw an thlang tlangpui thin a. Chutiang hmun remchang a awm lo a nih chuan thlanmual remchang emaw an hmang mai thin bawk.

Hetianga an thil ti lai hi mi hmuh an duh loh avangin an fimkhur hle thin. Ruihtheih thil leh sex te leh music an ngaihthlak theihna hmun te fimkhur takin an thlang hram hram thin. Tin, hmun thenkhatah erawh chuan zan rei, mi mut reh zanlai dar 12(p.m) vel ah te khawi lai hmunah emaw, hmun ualau lai ah pawh thawm nei vak lovin an ti thin tho bawk. Group hruaituten a hmun an thlan ang ang a ni tlangpui thin.Hmun thenkhatah chuan inthawina an hman zawh hian an zinga mipa thenkhat chu 'Sihal' angin an 'U' chiam thin a ni awm e(He thu hi an zing a tel thin nula pakhatin min hrilh atanga ka hriat a ni). A hu ho a inthawina hmang thin ho hian thla bial zan ( full moon) an thlang fo thin a. October thla bial zan phei chu an ngaihlu zual emaw tih mai tur in an hmang thin. Kum tin October 15 atanga November 15 hi Halloween denchhen in khawvel pum huap a Satana betuten Satana Birthday lawm nan an hman thin a nih avangin hmun hrang hrang ah an uar hle.

Hmun thenkhatah chuan a huho mi pali emaw panga emaw te chuan kar tin Nilaini leh Zirtawp ni a inthawiin, tlai lam dar 5 leh dar 6 inkar, zanriah ei hun lai, mi reh lai ni a an hriat chuh in thlanmualah an inthawi thin bawk.

Mi thenkhat chu mahni tih tih a ti ve tawp mai, a hun leh hmun pawh thliar hrang lem lova inthawina hmang thin te an awm nual bawk. Zan rei tawh lam, chhungte mut hnuah te an mutna pindan (bed room) leh inthiarna leh bathroom-a inthawina hlan thinte an awm bawk. Gospel camping neih lai a lo inthawi te, School-ah zana inthawi te ( hosteller) an awm bawk. Hetianga a huho (group) emaw mimal angin emaw inthawina an hlan thin hian Satana chu mihring hmel anga in larin an inthawina 'hun serh' chu a rawn hmanpui zeuh zeuh thin niin an sawi. Inthawina an hlan lai hian mahni thiante hmel tihbaiawm tak leh Satana hmel rapthlak tak ang a hmu te pawh an awm fo thin laiin mi thenkhat erawh thung chuan Satana chu tlangval hmeltha tak anga hmute pawh an awm bawk. Inthawi nan hian Mizoramah chuan Zawhte thisen te, anmahni thisen te an hmang tlangpui thin. Chung thisente chu mi thenkhat chuan 'Pentagram' an siam ah chuan an theh a, an chhampual thin a. Mi thenkhat erawh chuan an taksa khawi lai emaw chu an zai thi ringawt bawk a, mi thenkhat erawh chuan anmahni thisen chu an in leh a, mi thenkhat erawh chuan an thiante thisen nen an thisen chu an chhun pawlh a, an in thin. Inthawina an hman hian 'Satanic sign' zingah hman bik an nei thin a, chu chu lei ah emaw, paper-ah emaw, bangah emaw an ziak bawk.

SATANISM THAT LOHNA / PAWINA CHHAN.

Sam 73:25-ah chuan, " Vanah khian nang lo chu tu nge ka neih ang?.Leiah pawh hian nang lo chu ka duh tumah an awm lo" tih kan hmuh laiin chu nun kalsan a Satana biak chu Pathian pawi sawina SUAL lian tak a ni. Exodus 20:3- ah chuan,"Keimah lo chu Pathian dang reng reng i nei tur a ni lo" tih kan hmu a, Satanism hi Pathian Fapa rahbehna a tling bawk ( Pathian Fapa rap bet a,thuthlung thisen, amah tihthianghlimna chu thil naran a ruat a...Heb 10:29).
Satanic hmanraw lar tak 'Baphomet' an tih phei chu Isua hmuhsitna leh tih elna nasa tak ani nghe nghe.Thuthlung Hlui ah chuan pathiandangte be lo tur leh pathian dang be tura thlemtu chu 'TIHHLUM TUR' a ti hial zawk a ni ( Deut.13:6-10). Pathian thikthu a chhe hle.

Mi thenkhat in " Satana betute pawh an da leh tawh, an be rei peih lo" tiin fiamthu thawh nan an hmang fo mai. Hei hian 'Satanism' pawizia an hriatchian tawk lohzia a ti lang awm e. Misual ten Lal Isua-ah piantharna an lo chan veleh hian Thlarau Thianghlim in a chhinchhiah thin a (Ephesi 1:13,14 & Johana 14:17), miin Satana an biak veleh hian Satana thlarau 'Ramhuai ( Thlarau Sual)' in a awmchilh ve nghal thin.Hetiang hi a nih avangin Timothe'an 'Ni hnuhnung a mite' a tih ang mizia an lo nei thin ( 2.Tim.3:1-5).Satanic ka hriat zingah za-a za ( 100%) in ramhuai an pai a ni. Campingah te vawi tam tak lut htin mahsela an kawchhung a ramhuai kha hnawhchhuahsak an nih loh chuan 'Thlarau Thianghlim a piantharna' an chang thei lova, piangthar ni a inhria in lo nung zui pawh nise thlarau lamah harsatna an nei zel tho a, 'Vanram' an thleng dawn chuang lo a ni ( ...tupawh Krista Thlarau nei lo chu amaha mi a ni lo . Rom.8:9b).

An kawchhunga ramhuai chu hnawhchhuahsak ni mahse an piangthar ta tihna a la ni chuang lo, '....khawvel tan khenbeh a awm a, khawvel pawh an tan khenbeh a nih loh chuan'(Galatia 6:14). An pianthar loh chuan ramhuai bawkin a luhchilh leh thuai thin ( Matt.12:43). Sualna chi hrang hrang ti te leh ruihtheih thil ti te an nunhlui a kir leh (piangthar hnungtawlh/da) nen a in ang lo hle a, huang khat a dah chi an ni lo.Satanic ni lo hnungtawlh emaw/ da emaw chu an nun ngaiah an kir leh a, ramhuai an pai kher chuang lo va, Satanic erawh chu ramhuaiin a nei/ luhchilh leh nghal thin. Chuvangin, Pathian mi hman tak rawngbawltu emaw piangthar tha tak emaw tanpuina tel lo chuan an tan Satana bawih ata a chhuah theih tawh loh reng reng.

Sawi tur a tam hle, kan sawi seng lovang.Crime ah te pawh hnuhma an nei zel a. Sap ramah chuan tualthat tute, rukru te, sualna hrang hrang a inhnamhnawih zingah Satana betute hnuhma a tam hle. Police, Doctor, Nurse, Sumdawng, Sawrkar hnathawk, politician etc zingah Satana betute an tam mai. Mizoramah pawh hian Crime investigation ah pawh an lang tan ta a ni.Chuvangin, Mizoram hi 'Kristian Ram' a nih ang ngeiin "Krista tan' nung ila, Satana tan a khua leh tui hi i pe phal lo ang u. Harh a hun a, thawh a hun tawh hle a ni. Satanism hi engmahlo ah kan ngaih zel chuan 'Ramhuai thiltihtheihna' nen nasa taka an chet hun a thleng lovang tih a sawi theih loh. Kan Kristian dan, nun leh thiltihah Pathian Thu ang a nung zel in Satana do ila Satana bawih a tang mek, Satanan bumna hmang a amah a inbiak tir "SATANIC/SATANIST' te i chhan chhuak ang u, LALPAN a hmangaih a ni. AMEN.(Source: Rinna Thiltihtheihna ( The Power of Faith) by: C.Lalfakzuala(Mafaka)).