S T I G M A T A

" Duh takte u, thlarau nazawng ring suh u, amaherawhchu thlaraute chu Pathian laka mi an ni nge ni lo fiah rawh u; thuhriltu der tam tak khawvelah an lo chhuah tak avangin." 1.John.4:1.

Stigmata hi enge ni?.



Stigmata hi mihring taksa-a 'chhinchhiahna emaw, ser emaw, Isua Kross-a khenbehna nena kaihhnawih theih hlim hnuhma emaw, na hriatna emaw' hi a ni a.He stigmata hi Tirhkoh Paulan Galatia mite hnenah "....ka taksa ah hian isua chhinchhiahnate ka pu si a,"(Gal.6:17) a tih nen hmehbel a lo chhuak a ni awm e.Greek tawng a Stigmata (plural) chu sal emaw, ran emaw chhinchhiah nana an hman ang hi a ni a. Mihring hetiang chhinchhiahna nei hi 'Stigmatic' tiin an vuah a ni.

Stigmata chungchang hi thil hran hranah a hman dan a thu in a in ang lo thei awm e.Stigmata hi Roman Catholic nen a inlaichin zual nghe nghe a, stigmatic tam zawk hi hmeichhia an ni nghe nghe a, Kristian ni lo zingah pawh Buddhist Stigmata pawh a lar hle a ni.

Stigmata lo lanchhuah dan engtin nge?.

Stigmata lo lanchhuah dan hi a tlangpuiin chi nga a awm thei a.Isua Kross-a an khenbeh laia a kut a kilhna hliam hnuhma te,hlinglukhum a khum laia a lu atanga thisen lo chhuak te, a nakah fei a an vihna hliam leh thisen te, a hnungzang an vuakna hnuhma te, a ke a an kilhna hliamte an ni a. Stigmatic thenkhat erawh chu chhungril lamah chauh na an tuar a, pawn lamah erawh a langchhuak kher lo thung. Hetiang mite hi mi pahnih lai Mizoramah hian kan hmu tawh nghe nghe a, hetiang hi 'invisible stigmata' an ti thin.Hetiang mite leh hetiang lama tui te hi 'sakhaw atchilh hi' an ti mai thin.An taksa-a stigmata a lo lanchhuah dawn hian 'an taksa chu chhungril lam atang hian engtin emaw hian awmin a lo lanchhuahna lamah a rawn tawn vak thin a,' mi chi hrang hrangin an hriat dan a in ang lo nual bawk. Mi thenkhat chu an chau ngawih ngawih mai a, thenkhat erawhchuan an taksa chu na hian rawn tur ut ut in an hre thung a, thenkhat chuan tui puarpawleng (bubble) awm ang mai in an taksa chu puar pep pep in an hre thung thin.An taksa atang chuan Isua thisen ni ngeia an hriat chu a lo chhuak thin a. Chung thisen chu reilote ah a lo ro va, a ro rualin mi thenkhat chu a dam leh mai thin. Mi thenkhat erawh chuan damdawi lam thiamte(Doctor) an pan a, mahse damdawi hmang chuan a dam phah chuang lo a ni.Roman Catholic zingah Stigmatics hmingthang tak tak 16 chuang an awm tawh ani.
Stigmatic zinga mi St.Francis chu ni 40 chaw ngheiin Mt.Alverna-ah a tawngtai a. Chutih lai chuan Angel thla paruk nei a lo lang ta a. St.Francis-a chuan Angel chu Isua Kross-a khenbeh ngei kha niin a hria a. A thil hmuh chuan a barakhaih hle nghe nghe a, a taksa pawh chu Isua tuarna chuan fanchhuak nghal vekin a hre ta nghe nghe a. Angel kalbo hnu chuan a kut leh ke leh nakah te chuan Isua tuarna hliam hnuhma ang maiin a lo na ta nghal a, thisen leh tuite a lo chhuak ta a ni.Hun rei tak chhung chu he hliam hnuhma dam lawk lo hian a awm ta nghe nghe a ni.

Stigmata chu engtik hunlai a intan nge a nih?

Stigmata hi kum zabi 13-na hma lam kha chuan hriat a ni vak lova. Isua khenbehna 'Kross' chu Kristiante zingah 'chhinchhihna' anga a lo lar chhoh tak hnu khan a rawn intan ve niin an sawi.Damdawi lama mi thiam ten stigmata lo awm theih dan hi kawng hrang hrangin chhui thin mahse a nihna tak an hmuchhuak thei lo.An taksa atanga hliam leh thi lo chhuak thin a reh rual a a dam leh mai dan te, a awm rei deuhte pawh damdawi hmanga a dam theih chuan loh te thleng hian an ngaihtuahna a tibuai lo thei lo a ni.Tin, heng mite hian thiltihtheihna ( super power /devine power) nei anga in ngaihna te an nei zel mai bawk a, ngaihbel theih tur in anmahni kaltlang hian damlote pawh an dam ve zel tho bawk si a, rin leh rin lohna tur chungchangah a inhnial buai theih hle a ni.

Stigmata hi Pathian hnathawh a ni thei em?.

He stigmata hi Bible atang leh ka tawn hriat (experience) atangin hrilhfiah dawn ila a tha awm e :-
1.John.4:1-3 a kan hmuh angin ' Thlaraute chu Pathian laka mi a ni nge ni lo fiah thin turin' min hrilh a. he stigmata lo lanchhuah dan hi Tirhkoh Paulan 'Eng tirhkoh anga insiam" a tih nen khan a hmehbel theih awm e. ( 2. Kor.11:14). Mi tam tak chuan thil danglam leh thilmak anga langte chu Pathian atanga chhuak emaw tiin kan bawh nghal huam huam a, kan phurpui chiam mai thin. Hun hnuhnungah phei chuan 'Sakawlh' chu thiltihtheihna nasa tak a thuam ani dawn a, mi thianghlimte meuh pawh hneh theihna thuneihna pek a ni dawn nghe nghe a nih kha (Thup.11:7).Bible chuan, 'Thlaraute chu Pathian a mi a ni nge ni lo fiah turin' min hrilh a.Chuvangin kan fimkhur a ngai a. Kan hriat theih dan tur chu ' a lo intan dan/ a lo thlen dan bulpui leh a hmanruate' kan hriatchian hmasak a tul thin.Hetiang Stigmata hi Bible thu ,"Tun achinah hian tumahin mi tibuai tawh suh se; ka taksaah hian Isua chhinchhiahnate ka pu si a,"(Gal.6:17) tih tanchhanin an taksa ah Isua tuarna lo langchhuak angin sawi thin mahsela,'STIGMATA HI PATHIAN HNATHAWH NI LOVIN SETANA HNATHAWH' tih chiang taka kan hriat a tha awm e.
Hman deuh khan Aizawlah pawh 'tui damdawi' mi thenkhatin an buaipui chiam tawh a. Mahse, a lo chhuah dan kha an han hriatchhuah chuan Pathian atangin a ni lova, a fel fai tawk lo nghe nghe a, an mualpho ta a nih kha. Mi thenkhat tihdam rawngbawlna nei zingah pawh an kut emaw damlo an tawngtai/ khawih dawn a lo danglam ta thut sawi tur an awm bawk. Kan hriat tur chu Pathianin thilmak a tih dawnin a hmanruate kha a ti danglam kher ngai lo. Mosia pawh khan ' ka dang a awk si' tiin Pathian hmaah chhuanlam a siam a, mahse Pathianin a hmang tho, a dang awk a tihrehsak kher chuang lo. Mosia tiang rula a chan pawh khan, a tiang kha rul ang takin a awm hmasa kher chuang lo bawk.Chuvangin, Thlarau Thianghlim erawh chuan misual a tiboral lova, kan sualna erawh a ngaidamin misual chu 'Krista rualin a ti nung' mai thin. An sual ang angin a ngaidam a ni. Mihring hnena a inlar pawhin Thlarau Thianghlim chuan Lal Isua chawimawina turin (John.16:14) hna a thawk a. Thinlung, Bible thu leh tawngtaina hmangin a inlar tlangpui a. Pawnlam landan atanga inlarnate zingah heng benga aw hriat, mit a hmuh theih leh chhinchhiahna chi hrang hrangte hi Pathian hnathawh chu awm thin bawk mahse Setana inlar duhdan langsar tak a ni fo bawk thin a ni.

Setana hnathawh tih proof na a awm em ni?

Mizoram pawn a mi ' Stigmata' nei mi pakhat chuan buaina a nei thin a, ramhuaiin an tibuai nasa thin hle a ni awm e. a thiante pawhin an manganpui em em a, amah lah chu Pathian rawngbawl nia inhria a zin kual reng thin a ni lawi bawk si a. A awmdan chu mi thenkhatin an ringhlel tlat bawk si a, a thlarau chan chu ' eng thlarau nge' fiah an duh avangin Mizoramah ( kan hnenah) an rawn hruai ta a.He stigmata nei hian Isua a hmuh dan leh piangthar nia a inhriat dan te chu min hrilh ta vek a.Setana bumin a lo awm tluanchhuak parh a ni.

Kum 2006 kha Kristian Kohhran pakhatah ' harhna' a thleng a. chumi atang chuan Isua neiin a inchhal a, piangthar nia inhria in Pathian rawngte pawh chu a lo bawl tan ta a ni. Zan khat chu a muhil thei lova, zing dar thum velah chuan a mutnaah chuan Setana chu a rawn inlar ta a. Setana chuan a kut pahnih chu che thei lovin a rawn phuarsak ta tlat mai a, a mang ang ta em em mai a ni. Chutianga mangang taka a awm lai chuan Angel (Vantirhkoh) pathum, puan var sin, an hmel eng em em mai hi a mutnaah chuan an lo kal ve ta thung a. Angelte chuan"Setana phuarna kha kan rawn phelhsak dawn che a ni" an rawn ti a, tichuan a kut phuarna chu an phelhsak ta a. Chupa chu a lawm em em mai a. Pathianin Setana hnen atangin a chhhanchhuak niin a inhriat avangin a hlim hle a ni. A tukah chuan Pastor hnenah zan lama a thil tawn chu a hrilh ta vek a, Pastor chuan" Pathianin Setana lak atangin a chhanchhuak che a nih chu" a lo ti a. Pastor thurawn ang chuan Pathian hnenah a nun zawng zawng a hlan ta a ni.

Hun a lo kal zel a, Pathian rawngbawl in khaw thenawmahte a zinchhuak fo thin a, mite pawhin a rawngbawlna chu ngiahlu in an panin an inahte an ko bawk thin a, mahse chung hun lai pawh chuan Setana nen nasa takin an insual fo thin a ni awm e.A chang chuan Setana chuan a taksa chau hnap khawpin a sawisa thin a. Chungte chu a ngaihdan chuan Pathian hnena a inhlan avangin Setanan a hua a, a sawisa thin niin a hria a ni.Zan khat chu a thiante nen in pakhatah hian an tawngtai ho a, an tawngtai lai chuan a hnenah Isua a rawn inlar ta a. Isua chuan,"I taksa-ah khan Kross-a ka tuarna a takin ka chantir dawn che" a rawn ti a, tichuan Isua chu a taksa ah chuan a rawn lut ta a ni. An tawngtai zawh chuan chumi in a calendar intar a Isua lem chu a kutin a va khawih a, chuveleh a kutphah ah chuan Isua khenbehna hliam ang a lo awmin thisen a lo chhuak ta mai a, mak an ti em em a. Chumi hnu chuan a khat tawk hian a kut leh ke leh lu atangte chuan thisen a lo chhuak ta fo mai a ni. Hetianga thi a lo chhuah lai hian a kutphah chu chhungril lamah hian thil durh puak pep pep ang hian a rawn na chhuak thin nin a sawi. He stigmata hi a lo awm dawn apiangin Isua tia a sawi kha a rawn inlar phawt a, a taksaah a rawn lut a, tichuan a taksa atangin thisen a lo chhuak ta thin a ni.

Hepa chunga thil lo intan dan hi bumna hlir a ni a.Setana khan a kut a rawn phuarsak phawt a, chumi hnuah 'vantirhkoh' anga rawn inlar lehin setana hnen atanga chhanchhuak angin a rawn thawk a. Ani chuan, Pathianin a chhanchhuak angin a ngai lo thei lo a ni.Bible in Isua tuarna kan tawmpui dan tur min zirtir chu ' nitin mahni Kross put' a nih laiin ani chu a taksa ah a lo langchuak thung a. Thlarau Thianghlim chu ringtute hnenah a awm dawn a,a kalsan dawn loh laiin( John 14:16,17), a hnena Isua anga rawn inlar thin a a taksa-a lut thin erawh chuan a duh hun a luh chilh a, a duh hun ah a chhuahsan leh mai thin thung a ni. Pathian Thlarau anga a ngaih theih turin bumna mak tak tak hmangin a bum nasa em em a, mahse bumin a awm tih a inhre ngai lo thung a ni.Chuvangin, STIGMATA hi a rintlak loh a, Pathian hnathawh a ni lo, Setana bumna hmanrua hlauhawm tak a ni tih kan hriat a pawimawh em em a ni. Hetiang rawngbawlna lek phei chu hnaih hauh loh tur a ni a, 'Ramhuai thiltihtheihna' liau liau ani e.