C H H A N D A M N A

"Chutianga thihna rapthlak ata chu Pathianin min chhanchhuak tawh a, min la chhanchhuak leh ang; min la chhanchhuak zel dawn tih amahah chuan beiseina kan nghat a." 2.Kor.1:10


Chhandamna : chu Pathianin mihringte hnenah sualna leh thihna ata chhandama a buatsaih a ni a. A fapa Lal Isua Krista hmanga kan chan hi a ni ( John.3:16). Hebrai tawnga 'Yasha' chu 'chhanchhuak' emaw 'chhandam' emaw tihna a ni a. Greek tawngin 'Sozo'(verb) an ti bawk.

Thuthlung Hlui kan zir chuan Nova leh a chhungte kha 'Tui let' ata chhandamin an awm a (Gen.7:1).Lota leh a chhungte pawh Sodom leh Gomorra khaw kang atangin chhandamin an awm a ( Gen.19:23-25).Mosia pawh a piantirhin Pharoa lak atangin chhandamin a awm a (Exodus.2:1-10).Israel fate pawh Pharoa bawih ata chhandamin an awm bawk a ni (Exodus 12:37-42).Roreltute hunlai pawh khan Israel fate chu hnamdang lak atangin Samsona te(Roreltute 13:5),Davida leh Samuela te hmangin a chhanchhuak thin (2.Samuela.8:6).

Rom 3:23 ah chuan " Mi zawng zawngin thil an tisual tawh vek a,Pathian ropuina an chang zo ta lo a ni," a ti a.Sual chu Pathian thu awih loh vang a ni a, sual man chu 'thihna' a ni bawk (Rom 6:23).Chuvangin, mi zawng zawng chu chhandam ngai kan lo ni ta a.'Chhandamna' chu Pathian fapa, Isua Krista avang a lo thleng hi a ni. (John.3:16-17).
Chhandamna chungchang hi kawng thumin Bible zirtirna atangin zir belh ila.
1. CHHANDAM TAWH : Mihring chu Pathian duhlohzawng a nung kan nih avangin Israel fate pawh Pathianin 'chhandamtu' a pe thin ang khan 'chhandamtu' kan mamawh a, a tello chuan kan inchhandam theih si loh avangin sual leh a thiltihtheihna lak ata chu Pathianin a fapa Isua Krista hmangin min chhandam ta a ni (Ephesi 2:1). Chuvangin Pathian thinlungah chuan mi zawng zawng chu chhandam kan ni tawh a (..nimahsela Lalpa Isua hmingah leh kan Pathian Thlarauvah tlenfai in ni tawh a, tih thianghlim in ni tawh a, thiam chang in ni tawh.1.Kor.6:11).Amaherawhchu chhandamna chu buatsaih ni tawh mahsela, a taka chang tur chuan mihring lamin tih tur kan nei a, chu chu 'rin' a ni.(...a ni chu mi zawng zawng chhandamtu a ni a,a ringtute chhandamtu a ni deuh ber mai .1.Tim.4:10, Rom 10:9,10).
2. CHHANDAM MEK : 1.Kor.15:2 ah chuan " Ka thu hrilh che u kha in ring mai mai a nih lohva, in pawm tlat anih chuan chu miah bawk chuan 'chhandam mek' in in awm a ni" a ti a. Hei hian Lal Isua chhandamna pawm tlat tute chu 'chhandam mek' ah awmin ' chhandamna famkim, khawvel tawp huna lo thleng tur chu' nghakin an awm tih min hrilh a. Chung mite chu 'rinna' a nungin an awm a (Galatia 2:20).Rinna intihsiakna tha chu bei a, chatuan nunna chu vuan a, chumi chang tura koh an ni bawk (1.Tim6:12).Chung lama thil awmah te chuan an rilru nghat a, leia thil awmahte chuan nghat lo turin zirtir an ni a, an nuna chu Krista Isua-ah thuhrukin a awm vang a ni a (Kol 3:12).An taksa pengte pawh Pathian duhzawng anga hmang tura beisei an ni bawk ( Kol.3:5-10, Rom 6:12-13).Sual leh thlemna tawk thin mahse taksa thiltihte Thlarauva an tihhlum thin chuan an nung zel dawn bawk a (Rom 8:13).Thih thlenga an rinawm chuan nunna lallukhum an chang dawn a (Thup.2:10), chuvangin, Krista Isuaa Pathian chunglam koh chhan lawmman hmu turin tiamchin lam an pan talh talh thin ( Phil.3:14).
He 'chhandam mek' nihna chang mek tute zingah hian hnung lama kir leh a awm theih avangin thlemna tuar hram hram turin min fuih a (Jacoba 1:1,2), thlemna hneh loh vangin 'Vanram' a thlen loh theih dawn a ni.Chhandam mek te chuan 'chatuan nunna' an vawn tlat a tul a (1.Tim 6:12), chu chawlhnaah chuan an lut mek a ni si a (Heb 4:3). Chhandam mekte chuan chhandamna famkim (vanram) chu beiseina leh rinnain an thlir reng thin a, an nghak fan fan thin a ni (Rom 8:24,25).
3. CHHANDAM TUR : 1.Petera 1:5 ah chuan " Chhandamna hun hnuhnunga lang tura peihsa chu hmu turin Pathian thiltihtheihna a ven chu in ni" tih kan hmu a, hei hian 'chhandamna famkim' ringtute chawlh hlenna tur a sawi a. He chhandamna hi 'ropuina chhandamna'(glorification) tiin a sawi theih bawk (Rom 8:18).Hei hi Lal Isua lo kal leh hun a ringtute chan tur a ni a, heng thilte hi a thleng dawn a ni.
1) Mi felte chu kumkhaw nuna ah an kal ang (Matt 25:46).
2) Mi felte chu an Pa ramah 'Ni' angin an eng tawh ang ( Matt 13:43).
3) Tawih thei hian tawih theih tawh lohna a sin ang a, thi thei hian thih theih lohna a sin ang(1.Kor.15:53).
4) An riltam leh tawh lovang a, an tuihal leh tawh lovang. Ni in a em hek lovang a, lum reng reng pawhin a tihrehawm hek lovang (Thup.22:12, Luka 6:23).
5) Lawmman pek an ni ang ( Thup 22:12, Luka 6:23)
a) Nunna Lallukhum ( Thup.2:10, Jacoba 1:12).
b) Ropuina Lallukhum ( 1.Petera 5:4)
c) Lalukhum (Thup 3:11, 9:7))
d) Ropuina leh chawimawina Lallukhum ( Sam 8:5).
e) Felna Lallukhum (2.Tim.4:8)
Khawvel hrehawm piah lama chen chu ringtute chuan an chakin an nghakhlel thin a. Khawvela chen a, khawvel thilte ti duh sela chuan tihna remchang an hmu ngei ang, mahse ram tha lehzual chak an ni a, chu chu vana mi anih avangin (Heb.11:15,16) ramtiam lam panin an kal hram hram thin a ni.AMEN.